Mundart Geschichte von Reiner Bermel:

En oosem Heimbach-Weis wor mo widdä mäschdesch wat los. De Prinzegaad „Ruude Funke Weis“ hann em Luna-Park iä 66-jörijes Beschtoon met em Oktowäfäst gefäiet. Haidewitzka, bat wor dat schön. Owä, de Räi noo. 1954 hät met de Gründung fonn de Weiser Schtadtsoldate alles begonne on 1957 hät sesch de Weiser Prinzegaad em Saalbau Hamm gegründ. Et geft se höüt noch on dat es good su, wail se aus em Fassenacht, met üwä fuffzesch Gadiste on Funkemarieschä, net mie wäk tse denke sen. Se hälewen de KG Weis bo et nuä gäät.

 

Gründungsmitglied Fritz Rutkowski es sait 66 Joä  ömmä noch äng met „säine Ruude“ febonne  on hä es mäschdesch schtolz off dat, bat die laiste. On bat se laiste könne, hann se Ände Septämbä em Luna-Park gezeischt. Bär de Prinzegaad Weis kännt, da wääs, dat se net nuä an Fassenacht of de Gass säin. Nä, sai sen ooch baim Schtoff-on Doochmarkt, bäi de Kärmes on em Dorffäst, bäim Baza odä bäim Rummeschdorfä Wainachtsmarkt em Änsatz. Wail se fill mie als Fassenacht könne, hann se sesch gedaacht, en Oktowäfäst met Ässe, Trönke on Mussik tse feanstallte. On dat es inne och foll on ganz gelunge. Se hann en mäschtijes Zält offgeschtällt on e schön Programm ausgesoocht. Bat me good gefalle hät, wor, dat de Hauptmann, Mirko Thiel, on de Schpieß, Oliver Johann, kään gruuse Rede geschwunge on sesch selewä bewairäüschet hann. De Mussikfeain Heimbach-Weis hät gekonnt de Löüt em Zält en Schtimmung gebraacht on dann ging de Post met de bayerische Partyband Wies`n Stürmer ab. De ganze Omend hann die good gelaunte Löüt metgesunge, gedanzt on de Hänn säin tsom Himmel geflooche. Fassenacht em Septämbä, ainfach klasse! Apropo Fassenacht. Baal gäät es widdä loss, on esch dänke, dat de Ruude Funke Weis beraits widdä en de Schtartlöchä schtoon, om oos bäi de Feanschtalldunge fill Spass tse beraite. Onna oos gesoot. Esch ben doesch on doesch en Heimbach-Weiser Jung owä wänn et öm de Fassenacht gäät, schlööd mäin Härz füä die Ruude aus Weis. Böröm? Esch ben en Weis gebore, gruus gewore on bäi de „Weiser Baachwätz“ aktiv. Sorry, iä „Blaue“ aus Heimbach. Owä iä macht och en goode Schopp on et gäät em grund genomme, nuä gemainsam. Do müsse me hinkomme on dann es me öm de Heimbach-Weiser Fassenacht net bang. En demm Sinn, „Oos kann käner, Ömmer Parat“ on danke nochemo an de Ruude Funke Weis füä dänn schöne Omend em Luna-Park.